ગાંધીનગર: કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલે મંગળવારે રાષ્ટ્રીય સ્ટાર્ટઅપ દિવસ નિમિત્તે નવી દિલ્હીમાં સ્ટાર્ટઅપ રેન્કિંગ 2022ના પરિણામોનું અનાવરણ કર્યું હતું.
‘સ્ટાર્ટઅપ ઈન્ડિયા’ પહેલ હેઠળ ગુજરાતે સતત ચોથી વખત સ્ટાર્ટઅપ રેન્કિંગમાં શ્રેષ્ઠ દેખાવ કરનાર રાજ્ય બનવાનું ગૌરવ પ્રાપ્ત કર્યું છે.
મુખ્યમંત્રી શ્રી ભૂપેન્દ્ર પટેલે આ વિશિષ્ટતા હાંસલ કરવા બદલ રાજ્ય સરકારના ઉદ્યોગ વિભાગ અને સ્ટાર્ટઅપ ઇકોસિસ્ટમ સાથે સંકળાયેલા સાહસિકોને અભિનંદન પાઠવ્યા છે.
ઉપરાંત, ભારત આજે લગભગ 1 લાખ, 17 હજાર માન્ય સ્ટાર્ટઅપ્સ અને 111 યુનિકોર્ન સ્ટાર્ટઅપ્સ સાથે વિશ્વનું સૌથી મોટું સ્ટાર્ટઅપ હબ બની ગયું છે.
દેશના રાજ્યોમાં વધુ નવીનતા અને ઉદ્યોગસાહસિકતાને પ્રોત્સાહિત કરવા માટે, કેન્દ્ર સરકારના ડિપાર્ટમેન્ટ ફોર પ્રમોશન ઑફ ઇન્ડસ્ટ્રી એન્ડ ઇન્ટરનલ ટ્રેડ (DPIIT) એ સ્ટાર્ટઅપ રેન્કિંગ ફ્રેમવર્ક માટે એક સ્કીમ શરૂ કરી.
આ માળખા હેઠળ, તાજેતરમાં, વર્ષ 2022ના રેન્કિંગ માટે, DPIIT અને સ્ટાર્ટઅપ ઈન્ડિયાએ 25 એક્શન પોઈન્ટ્સના આધારે સાત નિર્ણાયક સુધારાના ક્ષેત્રોમાં 33 રાજ્યો અને કેન્દ્રશાસિત પ્રદેશોનું મૂલ્યાંકન કર્યું.
મંગળવારે જાહેર થયેલા આ મૂલ્યાંકનના પરિણામોમાં ગુજરાતને સતત ચોથી વખત બેસ્ટ પરફોર્મર સ્ટેટનો એવોર્ડ મળ્યો છે.
મંગળવારે નવી દિલ્હીમાં આયોજિત એક કાર્યક્રમમાં રાજ્યના ઉદ્યોગ વિભાગ અને ટીમ ગુજરાતના વરિષ્ઠ અધિકારીઓએ એવોર્ડ સ્વીકાર્યો હતો.
અત્રે એ ઉલ્લેખ કરવો જરૂરી છે કે રાજ્યમાં સ્ટાર્ટઅપ કલ્ચરને વેગ આપવા માટે ગુજરાતે પ્રથમવાર સ્ટાર્ટઅપ પોલિસી 2015 લોન્ચ કરી છે.