અમદાવાદઃ આગામી લોકસભા ચૂંટણી માટે ગુજરાતમાં કોંગ્રેસના સાત ઉમેદવારોમાંથી એક ઉમેદવારે પોતાનું નામ પાછું ખેંચી લીધું છે. કોંગ્રેસ પાર્ટીના રાષ્ટ્રીય પ્રવક્તા રોહન ગુપ્તા, કોંગ્રેસના ભૂતપૂર્વ વરિષ્ઠ નેતા રાજકુમાર ગુપ્તાના પુત્રએ આજે ટ્વીટ કર્યું હતું કે તેઓ કોંગ્રેસના ઉમેદવાર તરીકે અમદાવાદ પૂર્વ સંસદ બેઠક માટે તેમની ઉમેદવારી પાછી ખેંચી રહ્યા છે.
રોહન ગુપ્તાએ એક ટ્વિટમાં જણાવ્યું હતું કે – ‘ગંભીર તબીયતના કારણે મારા પિતાને હોસ્પિટલમાં દાખલ કરવામાં આવ્યા છે અને હું કોંગ્રેસના ઉમેદવાર તરીકે અમદાવાદ પૂર્વ સંસદ બેઠક માટે મારી ઉમેદવારી પાછી ખેંચી રહ્યો છું. હું પાર્ટી દ્વારા નિયુક્ત નવા ઉમેદવારને સંપૂર્ણ સમર્થન આપીશ.’
રોહને આ અંગે પ્રદેશ કોંગ્રેસ અધ્યક્ષને સંબોધતો પત્ર પણ જોડ્યો છે. રોહનના પિતા અમદાવાદની ખાનગી સંચાલિત ઝાયડસ હોસ્પિટલમાં દાખલ છે.
અન્ય એક ઘટનાક્રમમાં રોહન ગુપ્તાના પિતા રાજકુમાર ગુપ્તા, કોંગ્રેસના દિગ્ગજ નેતાએ પાર્ટીમાંથી રાજીનામું આપ્યું છે.
નોંધનીય છે કે અગાઉ શહેર કોંગ્રેસ પ્રમુખ હિંમત સિંહે અમદાવાદ પૂર્વ બેઠક પરથી ચૂંટણી લડવાનો ઇનકાર કર્યો હતો. જગદીશ ઠાકોર, શૈલેષ પરમાર, ભરતસિંહ સોલંકી સહિત કોંગ્રેસના વિવિધ નેતાઓએ લોકસભાની ચૂંટણી લડવાની ના પાડી દીધી છે.
