ગાંધીનગર: ગુજરાત સરકારે એક નોંધ દ્વારા માહિતી આપી છે કે મુખ્યમંત્રી ભૂપેન્દ્ર પટેલે સુરેન્દ્રનગર જિલ્લાના ધ્રાંગધ્રા, મૂળી અને વઢવાણ તાલુકાના 45 ગામોને સિંચાઈ માટે નર્મદાનું પાણી આપવા માટે રૂ. 417 કરોડની યોજનાને વહીવટી મંજૂરી આપી છે.
આ ત્રણ તાલુકાના 45 ગામોને સરદાર સરોવર નર્મદા નિગમ હેઠળની એકપણ બ્રાન્ચ કેનાલ દ્વારા સિંચાઈના પાણીનો લાભ મળતો ન હતો.
આ અંગે સુરેન્દ્રનગર જિલ્લાના સાંસદ-ધારાસભ્ય, જનપ્રતિનિધિઓ, સ્થાનિક આગેવાનોએ મુખ્યમંત્રી સમક્ષ કરેલી રજૂઆતનો મુખ્યમંત્રીએ હકારાત્મક પ્રતિભાવ આપ્યો છે.
સૌરાષ્ટ્રને નર્મદાના પૂરના પાણીના વધારાના 1 મિલિયન એકર-ફીટની ફાળવણીમાં સુરેન્દ્રનગર જિલ્લાના આ 45 ગામોને પાઇપલાઇન દ્વારા પાણી પહોંચાડવાની યોજના માટે મુખ્યમંત્રીએ રૂ. 417 કરોડની વહીવટી મંજુરી આપી છે.